ගොගොල් තරුණයා රුසියාවේ "සැන් පීතර්බර්ග්" නගරයට පැමිණෙන්නේ උසස් අධ්‍යාපනය ලැබීමේ නොනිත් ආශාවෙන් වූවද අපේක්ෂිත අරමුණ කරා යෑම ඔහුට විශාල අභියෝගයක් බවට පත් විය. යුක්රේනයේ "පොල්ටාවා" (Полтава) නම් ප්‍රදේශයේ 1809 වසරේ අප්‍රේල් මස 1 වැනිදා උපන් නිකොලොයි වසිලිච් ගොගොල් යනු කඩවසම් රූපයකට උරුමකම් කී අයෙකු නොවීය. එකී හේතුව නිසාම කුඩා කාලයේ සේම තරුණ අවදියේදීද ඔහු අන් අයගේ උසුළු විසුළු වලට ලක් වූ අතරම එය හැම විටම ඔහුව හුදෙකලා පුද්ගලයෙකු බවට පත් කරන ලදී. ගොගොල් පොල්ටාවාහි ගෙවූ ළමා කාලය තුළ ගැමි කතා, විශ්වාසයන් ඇදහිලි ඔස්සේ කිසියම් සාහිත්‍යමය පෝෂණයක් ලබා තිබීම හැමවිටම ඔහුව අනාගතය කරා මෙහෙයවීමට සමත් විය.
පීතර්බර්ග් නගරයට පැමිණි ගොගොල්ගේ අරමුණ නීතිය හැදෑරීම වූවද ආර්ථික නොහැකියාව විසින් එකී අරමුණින් ඔහුව ඈත් කරන ලදී. සුළු සුළු ලිපිකාර රැකියාවල් කරමින් එදිනෙදා ජීවිතය යන්තමින් ගැටගසා ගත් ගොගොල් ලේඛනයට අත්පොත් තබන්නේ මෙකී අපේක්ෂා භංගත්වයද සමගිනි. "අලෝව්" ආරූඪ නාමයෙන් ලේඛනයේ යෙදුන නමුත් ඔහුගේ කෘති වලට විවේචකයන්ගෙන් නිර්දය විවේචන එල්ල විය. එකී විවේචන දරා ගැනීමට අසමත් වූ ගොගොල් තමා විසින් ලියා තිබූ සියලු පොත්පත් වල පිටපත් එකතු කොට පුළුස්සා දැමීය.
මේ ආකාරයට කලකිරී සාහිත්‍යයෙන් ඈත් වී සිටියද සිය අභ්‍යන්තරයෙන් පැන නගින්නාවූ හුදෙකලාවෙන් මිදීම සඳහා ඔහු නැවතත් ලේඛනයට පිවිසෙයි. සිය ළමා කාලයේ ලැබූ අත්දැකීම් කාලාන්තරයක් තිස්සේ අභ්‍යන්තරයේ තැන්පත් වී තිබූ අතර එකී මතකයන් සහ ගැමි මිනිසුන් සිතින් මවාගනිමින් ඔහු අපූරු කෘතියක් එළි දක්වයි. එය "Evenings on a Farm Near Dikanka" ((Russian: Вечера на хуторе близ Диканьки, Vechera na khutore bliz Dikan'ki) නම් විය. කලා විචාරකයන් මෙය පැසසිය යුතු කෘතියක් ලෙස හැඳින්වීය. එවක මහා සාහිත්‍ය ධාරාවේ පුරෝගාමියෙකු වූ "පුෂ්කින්" ප්‍රකාශ කොට සිටියේ "නූතන සාහිත්‍යයේ මෑත කාලීනව තමා මහත්සේ ආශ්වාදනය කළ කෘතිය මෙය බවයි" මෙවන් පැසසීම් ඔස්සේ ගොගොල් තව දුරටත් ලේඛනයේ යෙදීමට තදින් අදිටන් කර ගත්තේය.
ඔහුගේ ලේඛනය තුළ වූ විශේෂත්වය වන්නේ "යුක්රේනියානු" ජන ජීවිතය පිළිබිඹු වීම සහ පොදු ස්ත්‍රී පුරුෂයන්ගේ ජීවිත වල වන හාස්‍ය සහගත තැන් තදින් මතු කර දැක්වීමයි. පසු කලෙක ගොගොල් හට පීතර්බර්ග් විශ්ව විද්‍යාලයේ කථිකාචාර්ය දූරයක් හිමි වූ අතර ඒ ඉතිහාස විෂය සඳහාය. නමුත් ලේඛකයෙකු ලෙස ලැබූ සාර්ථකත්වය කථිකාචාර්යවරයෙකු ලෙස ඔහුට ලැබිය නොහැකි විය. පසු කලෙක විශිෂ්ට ලේඛකයෙකු වූ "ඉවාන් තුර්ගනෙව්" එවක ඔහුගේ ශිෂ්‍යයෙකු වූ අතර ඔහුද ඒ බව සනාථ කරන ලදී.
ගොගොල්ගේ අග්‍රගණ්‍ය කෘතියක් වන "හිම කබාය" (The over coat) ලොව පුරා අතිශය ජනප්‍රිය වූ කෘතියකි. "අකාකි අකාකිවිච්" නම් චරිතය කේන්ද්‍ර කරගනිමින් එවක රුසියානු සමාජයේ වූ සමාජ අසාධාරණකම් සහ නිලදාරී වාදයේ වූ අහිතකර තත්වයන් සියුම් ලෙස විවේචනයට ලක් කොට තිබුණි. එය වෙනස්ම ආකාරයේ යථාර්තවාදී රීතියක් කැටි කළ කතාවක් වූ බැවින් පසු පරම්පරාවේ ලේඛකයින් හට මෙය යථාර්තවාදී ලේඛනයේ අත්පොතක් විය. ගොගොල් පූර්ණකාලීන ලේඛකයෙකු ලෙස සමාජයේ ප්‍රසාදය දිනාගත් අතර ලේඛනයේ ඉහළම තලයට අවතීර්ණ විය. අතීතයේ සිටම ගොගොල්ගේ ලේඛනය පිළිබඳව අවධානයකින් සිටි ඇලක්ස්සැන්ඩර් පුෂ්කින් හැම විටෙකම ගොගොල් ලේඛනයට උනන්දු කළේය. ඔහුගේ ඇරයුමක් අනුව ගොගොල් "මළ මිනිස්සු" නවකතා කෘතිය ලියා අවසන් කළේය. එය එකල රුසියාවේ බිහි වූ විවාදාත්මකම දේශපාලන නවකතාව ලෙස සැලකුණි. රාජ්‍ය තන්ත්‍රයත්, ප්‍රවේණිදාස ක්‍රමයත් අතිශය විවේචනයට ඒ තුළ භාජනය වී තිබුණි. මෙම කෘතිය නිම කිරීමටත් පෙර ඔහුගේ මිත්‍ර "පුෂ්කින්" මිය ගිය අතර එය ගොගොල් හට මහත් කම්පනයක් ගෙන ආවේය.
කල්යත්ම ගොගොල්ගේ මානසික ඒකාග්‍රතාව යහපත් වුයේ නැත. විවිද මානසික ඝට්ටනයන්ට ලක් වූ ඔහු ලේඛනයෙන් ඈත් විය. මළ මිනිස්සු නවකතාවේ දෙවන කොටස ලියා අවසානයේ එය ගිනිබත් කළේය. ආගම්වාදී මතවල කිසිදා එල්බගෙන නොසිටි ඔහු අන්ධ භක්තිකයෙකු මෙන් හැසිරෙන්නට විය. 1852 වසරේ පෙබරවාරි මස දිනෙක ඔහුගේ උන්මන්තක ස්වභාවය වැඩි වූ අතර එක දිගට දෙවියන් යදින්නට විය. එම මස 21 වන දින හදිසියේම ඔහු මෙලොව හැර ගියේය. මිය යෑමට මත්තෙන් ඔහු "මට ඉනිමගක් දෙන්න" "මට ඉනිමගක්" දෙන්න යැයි කෑ ගැසූ බවද වාර්තා වේ. මිය යන විට ගොගොල්ගේ වයස අවුරුදු 43ක් විය. ගොගොල්ගේ අවමංගල්‍ය උත්සවයට මහා සෙනග සතර දිගින් පැමිණියහ. ඉවාන් තුර්ගනෙව් එදින ජනතාව අමතා මෙසේ පැවසීය " ගොගොල් මිය ගියේය. එම වදනින් කම්පා නොවන්නේ කවරනම් රුසියානු හදවතක්ද? ශ්‍රේෂ්ට මිනිසා ලෙස ඔහුව ඇමතීමට හැකි කටුක ශෝකී අයිතිය අපට අද හිමි විය. ඔහු අපගේ සාහිත්‍යයට නව යුගය උදා කළ මිනිසාය. ඔහුට තව කළ හැකිව තිබූ දෑ අනන්තය" පසු කලෙක මහා රුසියානු ලේඛකයෙකු වූ "පියදෝර් දොස්තයෙවුස්කි" ප්‍රකාශ කර සිටියේ අප සියලු දෙනා ගොගොල්ගේ හිම කබායෙන් පැවත එන්නන් බවයි.
No comments:
Post a Comment