"කාලීඩ් හොසෙයිනි" විසින් රචිත කුළුඳුල් නවකතාව "The Kite runner" සිංහලයට නැගූ චූලානන්ද සමරනායක මහතාටද ස්තූතිවන්ත විය යුත්තේ මන්ද මෙය මෑත වකවානුවක පරිවර්තනය වූ විශිෂ්ට ගණයේ පරිවර්තන කෘතියක් නිසාවෙනි. ඔබට යම් හොඳ පොතක් කියැවීමට මග හැරුනේනම් එයින් ඇතැම් විට ජීවිතයේද කොටසක් මග හැරෙන්නේ යැයි මට සිතේ. කතා සාරාංශයක් කීමට අදහස් නොකරන්නේ එය ඇතැම් විට මෙම කෘතිය කියැවීමට යමෙකු පෙළඹවීම බාල කරන නිසයි. කතා සන්දර්භය ගැන පවසන්නේනම් සදාකාලික මිත්‍රත්වය, පක්ෂපාතිත්වය සහ අනෙකා වෙනුවෙන් ආදරණීය ලෙස කැපවන්නේ කෙසේද යන්න අවබෝද කරගැනීමට මෙහි එන ඇතැම් දුර්ලභ චරිත පාඨකයාට මග පෙන්වයි. අප අවට වූ ලෝකය අප සිතනා තරම් සුන්දර නොවන බවටත්, මිනිස් සමාජය ස්වකීය පාලනයෙන් තොරව භාහිර අදිසි හස්තයන්ගේ පාලනයට ලක් වූ කල සමස්ථ සමාජයකම වූ වටිනාකම් පුපුරා යන්නේ කෙසේද යන දේශපාලන දැක්මත් මේ කෘතියේ ආරම්භයේ සිට අවසානය තෙක්ම රචකයා පෙළ ගස්වයි. හදවත කම්පා කළ කෘතියකි. වර්ගවාදය, ජාතිවාදය,කුල වාදය වැනි අනේකවිද බෙදීම් තුළ බෙදා වෙන් කරන්නේ මනුෂ්‍යත්වය නොවේදැයි කියා අප අපගෙන්ම ප්‍රශ්නයක් අසනා තැනට රචකයා අපව රැගෙන යයි. එකී බෙදීම් තුළ අපට අහිමි වූයේ ආදරය, සෙනෙහස, මිත්‍රත්වය ආදී වූ පොදු මනුෂ්‍යත්ව ගුණාංග පමණක් බව මෙම කෘතිය අපගේ හදවතට දනවයි. ඇතැම් තැනක දෑස තෙත් කරන තරමේ සංවේදී භාවයකට අපව ඇද දමන ලේඛකයා එයින් මතු වන කම්පනය ඇට මිදුලු තුළටත් කාවද්දයි. වාර්ගික බෙදීම, යුද්ධය තුළ අසරණ වූ කුඩා දරුවන්ගේ සහ අනාගත පරම්පරාවක ඛේදවාචකයක් මා මේ කෘතියෙන් දුටිමි. සිනමා පටයක සේම කුතුහලය කතාවේ අවසානය තෙක්ම දිවෙන විශේෂ ලක්ෂණයක් වන අතර අවසන් වශයෙන් කීමට ඇත්තේ මෙය විශිෂ්ට ගණයේ නවකතාවක් බවයි.
No comments:
Post a Comment