ආයතනය තුළ තැන තැන සවි කළ සිනාසෙන මුහුණු සේවකයන් හට නව පණක් ගෙනදෙන ලදී. ආයතනේ පෙර තිබූ උදාසීන ස්වභාවය පහව ගිය අතර සේවකයන් නව ඇරඹුමකින් සිනාමුසු මුහුණින් සිය සේවාව නොපිරිහෙලා ඉටු කරන්නට විය. ආයතනයේ අරමුණ සාක්ෂාත් වීමත් සමග භාහිර සමාජය තුළත් Smiley Face සීග්‍රයෙන් ප්‍රචලිත වන්නට විය. 1972 සමයේ මෙම සිනා මුහුණ සටහන් කළ බොත්තම් (buttons) ඉතා ජනප්‍රිය විය. එවැනි බොත්තම් එම වකවානුවේ මිලියන 50ක් අලෙවි වූ බව වාර්තා වන අතර තවද සිනා මුහුණ රැගත් ටී ෂර්ට්, අත් ලේන්සු, කැප් තොප්පි ආදී අනේකවිද භාණ්ඩ වෙළඳපොල තුළ ජනප්‍රිය විය. අනෙකුත් ආයතනනද Smiley Face හරහා සේවක උද්යෝගය වර්ධනය කිරීමට උත්සුක විය. වර්තමානයේ පවා සමාජ ජාල වෙබ් අඩවි වල ජනප්‍රිය Chat Smiley Face සඳහාද පාදක වන්නේ මෙයයි.
මෙම සිනා මුහුණ නිර්මාණය කළ Harvey Ball නම් නිර්මාණ ශිල්පියා යනු එක් අතකින් අපූරු චරිතයකි. මන්ද ඔහු තමා අතින් කළ මේ නිර්මාණය මේ සා විශාල ජනප්‍රියත්වක් ලබා ලොව පුරා විවිද අයුරින් අළෙවි වුවද ඔහු එයින් කිසිදු ආර්ථික ලාබයක් උපයා නොගත් නිසයි. 1921 වසරේ උපන් ඔහු Worcester Art Museum ආයතනයෙන් චිත්‍ර කලාව විෂයයක් ලෙස හැදෑරු අයෙකි. දෙවන ලෝක යුද්ධයටද සහභාගී වූ මොහු එයින් පසුව විවිද දැන්වීම් ආයතන වල චිත්‍ර ශිල්පියෙකු ලෙස බොහෝ කලක් සේවය කොට ඇත. ඔබගේ මෙම ප්‍රසිද්ධ නිර්මාණය වෙනුවෙන් කිසිදු ලාබයක් නොලැබීම ගැන ඔබ දුක් නොවන්නේදැයි වරක් මාධ්‍යවේදියෙකු ඇසූ ප්‍රශ්නයකට ඔහු පිළිතුරු දුන්නේ සිනාමුසු මුහුණෙන්මයි. "ලෝකයම මගේ නිර්මාණය නිසා සිනාසෙනවානම්, ඔවුන් සතුටු වනවානම් මටත් එයින් සතුටු විය හැකියි. සතුට මුදලින් මිලදී ගත නොහැකියි" ඒ ඔහුගේ ජීවිත දැක්මයි. ලෝකයට සිනහවක් රැගෙන ආ මේ මිනිසා 2001 වසරේ අප්‍රේල් මස 12 වැනි දින ලෝකය හැර යනවා. නමුත් ඔහුගේ නමින් ඇරඹු "World Smile Foundation" නම් ස්වේච්ජා ආයතනය අදටත් ලෝකයේ දරුවන්ගේ සුබසාධනය වෙනුවෙන් ක්‍රියාත්මක වේ. එම ආයතන විසින් සෑම වසරකම ඔක්තෝබර් මස පළමු සිකුරාදාව "World Smile Day" ලෙසද නම් කරන ලදී.
_අයේෂ් ලියනගේ_
No comments:
Post a Comment